Меңдіқара аудандық Мансап орталығының жұмыс қорытындысы жайлы сұхбат жүргізген болатынбыз

 Бүгінгі таңда еңбек нарығын цифрландыру, Мансап орталықтарының жұмысын реформалау, нәтижелі жұмыспен қамту және жаппай кәсіпкерлікті дамыту, тұрғындарды жұмыспен қамтуды арттыру үшін ауқымды іс-шаралар легі көптеп ұйымдастырылуда.

Мақсат – жастарды жұмыспен қамтып, жұмыссыздықтың алдын алу.

Бүгінде аудандық Мансап орталығы қандай міндеттер атқарады? Олардың бүгінгі тынс-тіршілігі қандай? Жыл басынн бері неше адам жұмыспен қамтылды? Осы және басқа да сұрақтармен Меңдіқара аудандық Мансап орталығының басшысы Болат Мурзапайызовпен арнайы сұхбат жүргізген болатынбыз.

Айта өтсек, Болат Сарсенұлы 2025 жылдың қазан айынан бастап, орталықтың басшылық қызметін атқарады.

–Болат Сарсенұлы сәлеметсіз бе! Мансап орталығының негізгі жұмысымен таныстырып кетсеңіз?

-Сәлеметсіз бе! Мансап орталығы жұмыссыз азаматтарды есепке тіркеу және жұмысынан айырылған жағдайда әлеуметтік төлем тағайындау үшін қажетті құжаттарды қабылдайды. Жұмыссыздарды тұрақты жұмыс орындарына жұмысқа орналасуға жәрдем көрсетеді, уақытша жұмыс орындарын ұсынады. Еңбек нарығында сұранысқа ие мамандықтар бойынша қысқа мерзімді кәсіптік оқытуды ұйымдастырады. Әлеуметтік кәсіптік бағдар беру жұмыстарын ұйымдастырады. Азаматтардың барлық санаттарына арналған бос орындар жәрмеңкесін және халық арасында ақпараттық түсіндіру жұмыстарын жүргізеді.

–Статистикаға көз жүгіртсек, жылбасынан бері неше адам жұмыспен қамтылды?

-Статистика бойынша жыл басынан бері 1000-нан астам жерлестеріміз жұмыспен қамтылып, қазіргі таңда еңбек жолдарын жақсы нәтижемен жалғастыруда.

-Жалпы, орталыққа қай мамандық иелері көп жұмыс іздеп келеді?

-Меңдіқара ауданында нағыз сұранысқа ие мамандықтардың бірі, олар: ауыл шаруашылық ісінің мамандары, механизаторлар, агроном және дәрігерлері. Есепші, инжинер, аспаз, мұғалім, дәрігер, жүргізуші мамандықтары әрине әрдайым сұраныстағы мамандықтар.

–Электронды еңбек биржасы enbek.kz – тің тигізіп жатқан көмегі қандай?

– Еnbek.kz – мемлекеттік ақпараттық портал. Порталдың басты жұмыс – жұмыс беруші мен жұмыс ізденушіні байланыстыру. Онда жұмыс берушілердің арнайы тізімі болады. Жұмыс іздеуші өзінің мамандығы, өзінің біліміне байланысты жұмысты үйден шықпай-ақ, онлайн түрде іздестіріп, өзінің түйіндемесін қалдыра алады. Дамыған әрі ақпараттандырылған заманда жастарымыз жұмысты осы мемлекеттік портал арқылы іздеп, жұмысқа орналасуда. Сол себепті, мемлекеттік порталдың қоғам үшін атқарар қызметі орасан зор.

-Жұмыс сұрап келушілерге тұрақты жұмыс тауып бере алмаған жағдайда не істейсіздер?

-Мансап орталығының көмегіне жүгінген азаматты біз жұмыспен қамти алмаған жағдайда, ол кісініңм түйіндемесін бірден «enbek.kz» порталына жүктейміз. Портал автоматтық түрде түйіндемеге байланысты жұмыстарды тауып беріп, біз сол портал арқылы азамат, азаматшыларға жұмыс табуға тырысамыз. Бұдан бөлек, біздің орталықтың жастарымызға арналған түрлі бағдарламалары бар. «Жастар тәжірибесі», «Әлеуметтік жұмыс орындары», «Бизнес бастау», «Бірінші жұмыс орны», «Қоғамдық жұмыс» деген бағыттар бойынша жұмыс жасаймыз. Сол секілді қысқа мерзімді кәсіптік оқытуға жолдаймыз.

–Жыл басынан бері қандай бағытта, қандай бағдарлама арқылы қанша адам жұмыспен қамтылды?

–Жыл басынан бері Меңдіқара ауданында 1190 мамандарымызды жұмыспен қамтылған болатын. Соның ішінде, 131 жастарымыз қоғамдық жұмыс орындарына орналасса, 4 жас маман «Бірінші жұмыс орынә бағдарламасы арқылы өз еңбек жолын бастап отыр.

-Мемлекеттік бағдарламалардың қоғамға тигізіп жатқан пайдасы қандай?

-Әрине, мемлекеттік бағдарламалардың қоғамға, халыққа деген пайдасы өте көп. Оқуды бітіріп, қолға диплом алған жас мамандарымыз бірден бағдарламалар арқылы жұмысқа орналасып, өз еңбек жолдарын бастауда. Көптеген жас кәсіпкерлеріміз мемлекеттік жобалар, жеңілдетілген несиелер арқылы өз істерін дөңгелетіп отыр. Сол себепті, мемлекеттік бағдарламалар легі көптеп болып, халық игілігі үшін жасалып жатқан жобалар көп болсын деп тілейміз.

-Болат Сарсенұлы, бүгінгі сұхбатыңыз үшін сізге көп рахмет! Бүгінгі сұхбат біздің жас мамандарымыз үшін нағыз керек ақпарат деп білеміз.

-Сіздерге де көп рахмет!

Жастар игілі үшін жасалынып жатқан жобалар легі өз жалғасын табады деген сенімдеміз. Еліміздің болашағы – бүгінгі жастарымыздың қолында.

Сұхбаттасқан

Ақжан Байтұрсынова