Бағдарлама аясында мектеп оқушылары тамаша әсерге бөленді

Оразалы Қозыбаев атындағы Қаратал жалпы білім беретін мектеп оқушылары мен мұғалімдері 1- мамыр мерекесі күні еліміздің рухани астанасы Түркістан қаласына рухани жаңғыру бағдарламасы аясында барып келді

Түркістан – күллі түркі халықтарына ортақ әлемге әйгілі қасиетті де киелі мекен. Бұл ең алдымен Ислам дінін таратушыларының бірі, сопылық ілімнің негізін қалаушы, ғұлама дегдар, әулие тарихшы, ақын, философ Қожа Ахмет Яссауи жерленген өңірден басталған саяхатымыздың мақсаты – балалардың бойына рухани патриоттық сана – сезімді қалыптастыру.

Осындай киелі жерлерді аралау саяхатымызды Арыстан баб кесенесінен бастадық. Арыстан баб кесенесі – көне Отырар жеріндегі сәулет өнері ескерткіші. Түркістан халқының арасында мұсылман дінін таратушы Қожа Ахмет Яссауидің ұстазы болған Арыстан баб ата қабірінің басына салынған. Рухани жаңғыру бағдарламасы аясында қолға алынған «Қазақстанның киелі жерлері» картасын түзу аса – маңызды шара. Еліміздің киелі жерлері картасында Отырардың алатын орны ерекше. Ұлы Жібек жолының дархан даласына айналған өлке. Талай тартысқа куә болған Отырар деп, оқушылар мектеп қабырғасынан алған білімдерін, сол жерде алынған қосымша мәліметтермен толықтыра білді.

-Түркістан еліне сапарымыз осындай болады деген ойда болған жоқпын. Осыншама көп зиялы қауым өкілдері жатқаны жайлы, көптеген кесенелер жайлы елестете де алған жоқпын. Тек Түркістан дегенде Қожа Ахмет Яссауи кесенесі ғана есіме түсетін. Ал бүгін мұражайларға, түрлі кесенелерге барып тамаша әсерге бөлендік,- дейді мектеп оқушысы Мансұр Жамбыл.

Сапарымызды ары қарай Түркістан жеріне жалғастырдық. Атақты Әмір Темірдің пәрменімен салынған Қожа Ахмет Яссауидің кесенесі мен басқада жүздеген қазақ бабаларымыз жерленген кесенелерінде болды. Киелі орындарда балаларға тарихи – танымдық ақпараттар берілді. Оқушылар ер түріктің бесігі атанған қаланың бұдан өзге де қасиетті орындарда болып, тарихи жәдігерлермен жақынырақ танысып қайтты.

Лаура Исмагулова,

О. Қозыбаев атындағы Қаратал

жалпы білім беретін

мектебінің аға тәлімгері.