Ұлттық құндылық – тәрбие бастауы

Ұлы ағартушы Ыбырай Алтынсариннің 180 жылдығына орай ауданымызда көптеген ауқымды іс-шаралар өткізілуде

Қазақтың алғашқы қоңырауын соғып, баларды оқуға шақырған қазақтың аса көрнекті ағартушы-педагогы, жазушы, этнограф, қоғам қайраткері Ыбырай Алтынсариннің туғанына биыл 180 жыл. Сонымен қатар, Тәуелсіздігіміздің 30 жылдық мерейтойы.

Осыған орай наурыз айының 4-і күні Боровской облыстық санаторлық мектеп-интернатында «Ұлттық құндылық – тәрбие бастауы» атты келелі іс-шара өткізілді. Аталмыш шараға белгілі ақын, ыбырайтанушы Серікбай Оспанов, филология ғылымдарының кандидаты, профессор Күлзада Мырзағалиева, пофессор, философия ғылымдарының докторы Қалқаман Жақып және Дәмеш Жақып қатысты.

Шара барысында Меңдіқара ауданы әкімінің орынбасары Марлен Сандыбеков кеш қонақтарын айтулы мерейтоймен құттықтай отырып, Меңдіқара ауданы әкімінің атынан «Рухани жаңғыру» бағдарламасы аясында, Қазақстан Республикасының Тәуелсіздігінің 30 жылдығына, Ыбырай Алтынсариннің 180 жылдығына орай ұлттық құндылықтарды насихаттауға қосқан үлестері үшін Алғыс хаттар табыс етті.

Өмірзақ Сұлтанғазин атындағы Қостанай мемлекеттік педагогикалық университетінің профессоры «Ыбырай Алтынсарин» төсбелгісі мен ғылым саласындағы Ыбырай Алтынсарин атындағы сыйлықтың иегері Серікбай Оспанов жиылған жұртшылыққа ақ тілегін айтып, ұлт мақтанышы Ыбырай Алтынсариннің шығармалары мен өмір жолы жөнінде айтып өтті.
Кеш ұйымдастырушысы, тіл жанашыры, Боровской облыстық санаторлық мектеп-интернатының ұстазы Алтыншаш Есетова Алтынсариннің 180 жылдығына орай өткізіліп жатқан жұмыстарымен бөлісіп, барша қауымға ризашылығын білдірді және өзінің шығарма өлеңін оқыды.

– Даланың дара ұстазы Ыбырай Алтынсариннің туғанына биыл 180 жыл екендігі барлығыңызға белгілі. Айтулы мерейтойды кеңінен атап өтуі мақсатында, рухани жаңғыру бағдарламасы аясында бүгін келелі іс-шара ұйымдастырып отырмыз. Мақсатымыз қазақ халқының алғаш қоңырауын соққан ұлы ағартушымыздың салған сүре жолын зерделеу. Бүгінгі таңда осы орайда игі істердің атқарылып жатқандығы көңілді қуантады,- деді Алтыншаш Есетова.

Жерлесіміз, профессор Қалқаман Хасенұлы да халық алдында сөз сөйлеп, Ыбырай Алтынсарин жайлы көптеген тың ақпараттар айтты. Мағынаға толы келелі кездесудің, дөңгелек үстелдің ұйымдастырушыларына зор алғысын, дән ризашылығын білдірді.

Меңдіқара аудандық Ардагерлер кеңесінің төрағасы Есет Көбеков халық алдында сөз алып, кеш қонақтарына ақ жарма тілегін білдірді. Іс-шара мектеп-интернаты оқушыларының дайындаған мерекелік концертіне ұласып, балалар өздерінің тамаша өнерлерін көрсетті.

Тұрсынай Мұхтарқызы