Главные новости Мендыкаринского района – Qostanai Media

Қара шаңырақтың берекесін келтіріп, ауылдағы нағыз еңбекке бас иген Жомарт пен Айгүл Капешовтар

Бүгінде өз алдарына жеке шаруашылық қожалықтарын ашып, мал басын өсіріп, ата дәстүрді қолға алып отырған жайлары бар.

Ата-анадан  нағыз еңбектің наны тәтті дегенді естіп, адал еңбектерін көріп ер жеткен Жомарт ағамыз отбасында ұлдардың ішіндегі кенжесі. Әулеттің берекесі  Бағыт әжей жеті құрсақ көтерген,  күміс, алтын алқа тағынған ана. Бүгінде немере, шөберенің қолынан су ішіп, солардың қызық-қуанышына кенеліп отыр.

Бұл отбасында қашаннан  дастархандарынан ақ үзілмеген.  Май, құрт, айранмен қоса бие байлап денсаулыққа пайдасы зор қымыз баптауды Бағыт әжей  ертеден-ақ, қолға алған екен.  Отбасына Айгүл апамыз келін болып түскелі бие сауып, қымыз сапырудың  қыр-сырын енесінен үйренгенін жасырмайды.

-Міне, содан бері жыл сайын бие сауып, қымыз өндіріп отырғанымызға да отыз жылдан асып кетті дейді, -Айгүл апай. Мамыр айынан бастау алатын бие байлау маусымы қазан айына дейін жалғасады. Мамыр айының бал қымызына деген сұраныс жыл сайын артып келеді. Күніне 15-20 литр қымыз баптаймыз, өзіміздің бала-шағамыздан артылғанын  тапсырыспен ауыл-аймақ тұрғындары алып кетеді. Дәл қазіргі еліміздегі орын алып отырған пандемия кезінде қымыздан бөлек саумалға деген сұраныс артып отыр. Бие сүті түрлі дертке шипа, дәруменге бай екені белгілі. Сүттің  құнарлығы мал азығының жақсы болуынан. Сондықтан күнделікті жем-шөбі мен суын уақытылы беріп, биенің де бабын табуға тырысамыз.  Қымызға да ерекше баппен,  күтіммен қараймыз. Бәрі де адал еңбекпен, маңдай термен келетіні белгілі ғой. Дегенменен қымыздың литрін 700 теңгеден асырмаймыз халыққа қолжетімді болуы, біздің әлеуметке қосқан үлесіміз деп білеміз- дейді,  сөз  барысында Айгүл апай.

-Осы уақыт аралығында бір-екі бие ғана сауатынбыз.  Екі –үш жыл бұрын  мемлекеттік бағдарлама арқылы несие алып, сол қаржыға жылқы сатып алдық,  дәл қазір бес бие байлап отырмыз.  Ауылдық жерде тұрғандықтан табыс көзі мал шаруашылығы екендігі белгілі. Сондықтан мал басын көбейтіп, жеке шаруашылық қожалығын ашқан болатынбыз. Осы төрт жыл аралығында қара мал бағып келеміз, мемлекеттен субсидия берілгендігі де біз үшін үлкен қолдау. Малдың тұқымын жақсарту мақсатында қазақтың ақ бас бұқасын алдық, шағын шаруашылығымызды дөңгелетіп әкетуде  «Атамекен» қаржылық қолдау қорының көмегі зор болды. Еңбек етемін деген жанға қашанда жол ашық,  ең бастысы әр жанның алдына қойған мақсаты айқын  болу қажет- деген өз ойын жасырмады Жомарт ағамыз.

Мал баққанға бітеді деген нақыл сөздің астарына үңілсек, әр ауылда мыңғыртып мал өсірген шаруа қожалықтарының саны арта түссе бұл береке, ырыздықтың бастауы. Сонымен қатар, ата кәсіпке деген ізгі құрметтің жарқын көрінісін біздер бүгін  Капешовтар отбасынан көрдік.

Қымбат НАҒАШЫБАЙ