Главные новости Мендыкаринского района – Qostanai Media

Өнерлі, өнегелі жұп  Тұрағұлов Мұрат Темірбекұлы мен Гүлнұр Қабитанқызы ұстаздық қызметте де әріптес жандар

Бір оқу орынын тәмәмдаған олар, қолдарына диплом алған сәттен бір отбасы атанып алғашқы еңбек жолдарын да бірге бастаған екен.

Біраз жылдар Қаражар негізгі мектебінде адал еңбек етіп, қарапайым ұстаздық жолдан басталған еңбегінің нәтижесінде Мұрат ағай директорлық қызметке де тағайындалды. Бүгінде Көктерек негізгі мектебіне басшылық етуде.  Гүлнұр апай да  өз мамандығының майталманы. Алдына келген талай бүлдіршінге әліппе танытып, қалам ұстатқан білікті педагог.  Биылғы жылы Ғ.Жұмабаев атындағы Боровской мектеп-гимназиясының табалдырығын аттап отырған 23 бүлдіршінді қабылдап отыр.

– Марқұм әкем Қабитан Смағұлұлы Ұзынкөл ауданына қарасты Обаған ауылында 45 жылға жуық ұстаздық еткен жан еді. Өзімнің туып-өскен отбасымда екі бірдей апам да мұғалімдікке оқыған. Мен де әкемнен үлгі алып ұстаз атанып, ол кісінің ұлы ізін жалғап келемін. Өз мамандығыма бала күнімнен ғашық болып, есейіп ер жеткенде де осы мамандықты жаныма серік еттім. Соныдықтан жүрек қалауым болған ұстаздық қызметке қашанда үлкен жауапкершілікпен қараймын, – дейді Гүлнұр апай өз сөзінде.

Мұрат ағай мен Гүлнұр апайымыз ұстаздық қызметтен бөлек өнер саласында да өзіндік орындары бар нағыз талант иелері екенін айта кеткен жөн болар. Әрбір аудандық, облыстық іс-шараларға белсене ат салысып, ұлттық өнерімізді дәріптеу жолына  зор үлес қосып келе жатқан өнерлі жандар. «Меңдіқара дауысы!», «Айгөлек», «Бозторғай», «Бала дауысы» сынды аудандық, облыстық ән байқауларының жүлдегері атанып жүрген кенже қыздары Гүлсезім де өнерден кенде емес. Білім саласы бойынша жеткен жетістіктері өз алдына бір төбе. Бос уақытта бас қосқанда отбасының сүйіктісі ісі ұлттық аспапта ән салу. Мұрат ағай баян, гитара, домбыра аспаптарын еркін меңгерген. Балаларына да үйретіп келеді.

Ал ағай мен апайдың білім саласына сіңіріп келе жатқан өлшеусіз еңбектері қашанда аудандық, облыстық білім беру саласынан, өздері тәлім-тәрбие берген шәкірттерінің жетістіктерімен бағалануда.

Ұлдарын ұяға қыздарын қияға қондырып Мұрат ағай мен Гүлнұр апай ата әже-атанып, шаңырақтың тұңғышы Мейрамбек ұлдары мен Ұлбала келіндерінен Медина есімді немере сүйіп шаттыққа кенелуде. Ортаншы қыздары Мақпал да ана ізін жалғап бүгінде бір әулеттің келіні атанып отыр.

Осындай бәйтеректей мәуелі ұстаздар отбасын алдағы келе жатқан кәсіби мерекелерімен құттықтай отыра, озық ойлы шәкірт тәрбиелеудегі өлшеусіз еңбектеріне бас иеміз!

Қымбат НАҒАШЫБАЙ